Muscus, wat Sandal, ende een spiegel, waer mede sy tegen den avont aen lant voeren, belovende des anderen daechs 's morgens weder bescheet vanden Naique te brengen, als oock de monsters van eenige kleetkens, daer haer naer gevraecht hadden.

Den 28^e dito hoe wel haer belooft hadden des morghens vroech weder te komen hebben niemant vernomen voor avondt, dat een principael Bramene met des stadts schryver, alsoo sy seyden met noch eenige andere, aen boort quam, mede brengehnde eenige kleetkens, gants contrarie de geene die belooft hadden te brenghen, seyden haer aen van weghen den Naicque, dat aen landt souden komen, om met hem te spreecken, waer op antwoorden, dat hy haer eerst gijsselaers 't haeren contentement aan boordt moest bestellen, ende aldan souden zy hem komen spreecken. Ende alsoo zyse den vorighen nacht het gheheele strande langhs hadden sien vieren, oock eenighe Bassen, ende Roers hadden hooren afschieten, vraechden haer, wat dat beduyden, seyden datter een bruyloft aen Lant gheweest hadde, die sy die daer mede vereert hadden, sy wilden oock weten wat Coopmanschappen brachten, 't welck haer seyden, dat sy'er stracks den prijs afmaken wilden, dan gaven haer voor antwoorde, als sy haer kleetkens brochten, naer haer sin, alsdan souden haer de koopmanschap verkoopen, anderssints niet hielden heftich aen om haer mede aen lant te hebben, dan wilden niet, ten ware dito Bramenen, met noch een koopman, ghenaemt Mustapha, in ostagie wilde blijven, 'd welck sy seyden den Naicque te willen aenbieden, ende des anderen daechs daer op antwoorde brengen. Op gisteren hadden sy haer gheseyt, datter een koopman woonachtich tot Mussilipatan, ghenaemt Duria Cham, aen landt was, van wiens wegen alsnu eenen Turck mede quam, brenghende een schenckagie