weder naer haer Prauw gegaen, des anderen daeghs weder tot Iottan komende.

Den 9^e dito isser een Joncke uyt Malacca gearriveert met eenige Portugesche Mesticos, die haer seyden, als dat den Admirael Cornelis Matelief de 7 Schepen (die den Viceroy van hem gestuyrt) ontmoet hadde, teghen haer gheslaghen, van over beyde zeyden, naer veel dooden, ende ghequetste hebbende, zijn alsoo sonder meer uyt te rechten, van malkander ghescheyden; seyden oock, als dat den Heer Admirael onder de Custe van Pera het Gallion S.Anth. komende van Nagapatan, door haar te vooren aenghehaelt, weder ghemoet, genomen, ende verbrant hadde.

Eenen Portugies tot Grissic woonachtich, toonden haer eenen brief, die in Malacca soude gheschreven, eñ met dese Joncke gekomen wesen, waer in stont onder andere: In Iohor chegou huna nao nova d'Hollanda traze novos que nossa armada tomou na Canal de Fandres 9 naos Hollandeses que querian vir pera as Indias, y efto hutn Sol feapo. Den tijt sal de waarheyt in 't licht brengen, verhoopende dat het maer een valsch uytgheven van haer lieden sal wesen, om haer voor die van 't lant te verschoonen die dagelijcr anders niet en hoorden, dan van hare nederlage.

Dese Joncke bracht ooc tijdinge als dat sy 6 Hollantsche Schepen in de Strate van Palenbaon ghesien hadden.

Naer middach zijn van Grissick t'zeyl gegaen, dan des nachts raeckten weder aenden gront, alsoo sy de Custe van Madura te naer liepen.

Den 10^e dito naer middach raeckten vlot, doch alsoo het stille was, liepen wat af, ende lieten den Ancker weder vallen; des middernachts quam den Wint uyt den Westen, waer mede zy N.N.O. aenliepen, des nachts raeckten over de vlackte.

Den 15^e dito des voormiddaechs waren op de hooch-