den seer loghenachtich bevonden, so besloten dat van Soldt soude te lande waert intrecken, naer eenighe Cooningen, daer hy haer op bewees, die hy seyde hem groote partijen schuldich te wesen, om te besien, oft het soo was, waer over dito van Soldt des naermiddaeghs, vergeselschapt met Iacques de Mulder ende Iacob Ianssen, te paerde uytgereden ben. Des avonts quamen zy tot een Stadt, genaempt Sambuppo (daer hy haer op eenighe schulden bewees, die niet vele te bedieden hadden) alwaer dien nacht sliepen, manende eenighe Portugesen, die hy Gelt, Rijs, ende Folie gheleent hadde.

Den 23^e dito met den dagereden naer Cangila, welcker Coninck hy seyde hem schuldich was, van daer naer Ruppo, eñ Mangalin, daer ooc Coningen gouverneerden, die hy seyde hem schuldich waren, doch vonden dat het altemael logenen waren, dies beschaemt stonden, ende ten ware het een goetaerdich volck was, souden sonder perijckel van daer niet gheraeckt hebben, alsoo dese Koninckens verwondert waren, niet wetende wat dencken, dat haer aldaer quamen manen.

Des avonts met den donckeren zijn weder in Sambuppo ghekomen, alwaer weder vernachten. Des anderen daeghs haare boodtschap aldaer oock uytgerecht hebbende, eenighe schulden inmanende, ende sommige schuldenaers met haer nemende, die niet half soo veel schuldich waren als hy seyde.

Den 24^e dito weder in Tello ghearriveert, ende l'Hermite alles aenghedient hebbende, hebben met malkanderen sijne proceduren by gheschrifte gestelt, ende door den voorschreven Coopman doen onderteeckenen, denwelcken zy dien dach naer boort sonden om naer 't Vaderlant ghevoert te worden, ende hem selven voor haer meesters te verantwoorden.

Den Koninck was seer droeve, dat zy het Comptoor aldaer opbraken, ende zy beschaemt, wegen de schande